နိုင်ငံတော်စီမံအုပ်ချုပ်ရေးကောင်စီလက်ထက် ၂၀၂၄ ခုနှစ်၊ ဧပြီလအထိ MSME ဖွံ့ဖြိုးတိုးတက်ရေးဆိုင်ရာ ဆောင်ရွက်မှုအစီရင်ခံစာအား pdf ဖိုင်တွင် လေ့လာဖတ်ရှုနိုင်ပါသည်။

၂၀၂၂ ခုနှစ်၊ စက်တင်ဘာလမှ ၂၀၂၃ ခုနှစ်၊ ဒီဇင်ဘာလအထိ MSME ဗဟိုကော်မတီဥက္ကဌ၊ နိုင်ငံတော်စီမံအုပ်ချုပ်ရေးကောင်စီဥက္ကဌ ၊ နိုင်ငံတော်ဝန်ကြီးချုပ်နှင့် ဒေသအသီးသီးရှိ MSME လုပ်ငန်းရှင်များ တွေ့ဆုံပွဲမှတ်တမ်းအား pdf ဖိုင်တွင် လေ့လာဖတ်ရှုနိုင်ပါသည်။

အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေး ရန်ပုံငွေစီမံခန့်ခွဲမှုအဖွဲ့၏ (၂/၂၀၂၄) အစည်းအဝေးကို ၂၀၂၄ ခုနှစ်၊ ဇွန်လ ၂၀ ရက်နေ့၊ နေ့လည် (၁၄:၃၀) နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ် (၃၄)၊ အပေါ်ထပ်အစည်းအဝေး ခန်းမ၌ ကျင်းပခဲ့သည်။အစည်းအဝေးသို့ အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေး ရန်ပုံငွေစီမံခန့်ခွဲမှုအဖွဲ့ ဒုတိယဥက္ကဋ္ဌ၊ စက်မှုဝန်ကြီးဌာန၊ ဒုတိယဝန်ကြီး ဦးရင်မောင်ညွန့်၊ အဖွဲ့ဝင်များဖြစ်ကြသော စီမံကိန်းနှင့်ဘဏ္ဍာရေးဝန်ကြီးဌာန၊ မြန်မာနိုင်ငံတော် ဗဟိုဘဏ်၊ စက်မှုဝန်ကြီးဌာန၊ ဥပဒေရေးရာဝန်ကြီးဌာန၊ မြန်မာနိုင်ငံဘဏ်များအသင်း၊ မြန်မာနိုင်ငံ ကုန်သည်များနှင့်စက်မှုလက်မှုလုပ်ငန်းရှင်များအသင်းချုပ်နှင့် မြန်မာ့လယ်ယာဖွံ့ဖြိုးရေးဘဏ်တို့မှ တာဝန်ရှိသူများ တက်ရောက်ခဲ့ကြသည်။ အစည်းအဝေးတွင် ရန်ပုံငွေစီမံခန့်ခွဲမှုအဖွဲ့ ဒုတိယဥက္ကဋ္ဌက အဖွင့်အမှာစကားပြောကြား ရာတွင် ယနေ့ကျင်းပသည့်အစည်းအဝေးသည် ရန်ပုံငွေစီမံခန့်ခွဲမှုအဖွဲ့၏ (ပဉ္စမ) အကြိမ်မြောက် အစည်းအဝေးဖြစ်ကြောင်း၊ (၂၀.၃.၂၀၂၄) ရက်နေ့တွင် ကျင်းပခဲ့သော MSME လုပ်ငန်းကော်မတီ၏ (၁/၂၀၂၄) အစည်းအဝေးဆုံးဖြတ်ချက်အရ ချေးငွေကိစ္စရပ်များတွင် ငွေသားအစား စက်ပစ္စည်းဖြင့် ထုတ်ချေးနိုင်ရေးကိစ္စနှင့်ပတ်သက်ပြီး ရန်ပုံငွေစီမံခန့်ခွဲမှုအဖွဲ့အနေဖြင့် ဆောင်ရွက်ပေးနိုင်မည့် အစီအစဉ်များနှင့် ဆက်လက်ဆောင်ရွက်သွားမည့်လုပ်ငန်းစဉ်များကို ဆွေးနွေးနိုင်ရန် အစည်း အဝေးခေါ်ယူခြင်းဖြစ်ကြောင်းနှင့် တိုင်းဒေသကြီး/ပြည်နယ်များမှ ချေးငွေလျှောက်ထား လာသော MSME လုပ်ငန်းရှင်များအနက် သတ်မှတ်ချက်နှင့်ကိုက်ညီသော လုပ်ငန်းရှင်များကို ချေးငွေ အမြန်ဆုံးထုတ်ချေးနိုင်ရန် ဆောင်ရွက်ကြရမှာဖြစ်ကြောင်း၊ (၆.၆.၂၀၂၄) ရက်နေ့အထိ MSME အေဂျင်စီရုံးခွဲများသို့ လာရောက်လျှောက်ထားသော ချေးငွေအဆိုပြုလွှာ (၅၈) ခု ရှိပြီး ချေးငွေ ဆိုင်ရာလုပ်ငန်းအဖွဲ့မှ စိစစ်လျက်ရှိကြောင်း၊ ချေးငွေအဆိုပြုလွှာများအနက် ချေးငွေဆိုင်ရာ လုပ်ငန်းအဖွဲ့မှစိစစ်ပြီးဖြစ်သော ကချင်ပြည်နယ်နှင့် ရှမ်းပြည်နယ်မှ လုပ်ငန်းရှင် (၁၀) ဦးကို ချေးငွေခွင့်ပြုနိုင်ရေးကိစ္စနဲ့ပတ်သက်ပြီး အစည်းအဝေးမှာ ဆွေးနွေးအတည်ပြုပေးကြရန် ဖြစ်ကြောင်း စသည်ဖြင့် ဆွေးနွေးမှာကြားပါသည်။ဆက်လက်၍ ချေးငွေဆိုင်ရာကိစ္စရပ်၌ အချို့သောကိစ္စရပ်များအတွက် ငွေသားဖြင့် ချေးပေးခြင်းအစား အခြားလိုအပ်သော စက်ကိရိယာပစ္စည်းများ ထုတ်ချေးနိုင်ရေးနှင့်ပတ်သက်ပြီး ရောင်းချသူသို့ တိုက်ရိုက်ပေးချေသည့်စနစ်၊ KfW ချေးငွေကဲ့သို့ လုပ်ငန်းရှင်၏ရွေးချယ်မှုဖြင့် ဝယ်ယူသောစက်ပစ္စည်းအပေါ် ဘဏ်မှချေးငွေဖြင့် ပေးချေသောနည်းလမ်းတို့ကို ဆွေးနွေးခဲ့ကြပြီး ဆက်လက်ဆောင်ရွက်သွားမည့် ရှေ့လုပ်ငန်းစဉ်များကို အဖွဲ့ဝင်များက ဝိုင်းဝန်းအကြံပြု ဆွေးနွေး ခဲ့ကြသည်။ ထို့နောက် အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုး တိုးတက်ရေး ရန်ပုံငွေစီမံခန့်ခွဲမှုအဖွဲ့ ဒုတိယဥက္ကဋ္ဌက MSME လုပ်ငန်းကော်မတီဥက္ကဋ္ဌ၏ လမ်းညွှန်ချက်များနှင့်အညီ MSME များလိုအပ်သော ငွေကြေးအရင်းအနှီးများကို လုပ်ထုံးလုပ်နည်း နှင့်အညီ MSME ရန်ပုံငွေမှ ထုတ်ချေးနိုင်ရန်အတွက် ဆောင်ရွက်ရန်နှင့် MSME အေဂျင်စီနှင့် ရန်ပုံငွေစီမံခန့်ခွဲမှုအဖွဲ့တို့ ပူးပေါင်း၍ MSME ချေးငွေများ မြန်ဆန်မှန်ကန်စွာ စိစစ်ထုတ်ချေး နိုင်ရေးဆောင်ရွက်သွားရမည်ဖြစ်ကြောင်း လမ်းညွှန်မှာကြားခဲ့သည်။

ရုရှားနိုင်ငံ NPP A- Engineering LLC Company သည် မြန်မာနိုင်ငံတွင် စိုက်ပျိုးရေး အခြေပြု စက်မှုလုပ်ငန်းများဆိုင်ရာ ဝန်ဆောင်မှုများပေးနိုင်ရန် ရည်ရွယ်၍ ပြည်ထောင်စုဝန်ကြီးနှင့် လာရောက်တွေ့ဆုံခဲ့ပြီး နေကြာဆီနှင့် အခြားစားသုံးဆီများ ထုတ်လုပ်သည့် စက်များအား မြန်မာနိုင်ငံသို့ လာရောက်တပ်ဆင်ရောင်းချပေးမည့် သတင်းအချက်အလက်များအား ပြည်နယ်/ တိုင်းဒေသကြီး/ ပြည်ထောင်စုနယ်မြေ နေပြည်တော်တို့ရှိ စားသုံးဆီထုတ်လုပ်လျက်ရှိသည့် MSME ဆီလုပ်ငန်းရှင်များထံသို့ အကြောင်းကြားပေးပို့ခဲ့ပြီး စားသုံးဆီထုတ်လုပ်မှုဆိုင်ရာ ရင်းနှီးမြှုပ်နှံမှု ပြုလုပ်ရန် စိတ်ဝင်စားသည့် ပြည်နယ်/ တိုင်းဒေသကြီးများမှ လုပ်ငန်းရှင် (၃၄) နှင့် အခြားဆီလုပ် ငန်းရှင် (၆၄) ဦး၊ စုစုပေါင်း (၉၈) ဦးတို့အတွက် “ရုရှားနိုင်ငံ NPP A-Engineering LLC Company မှ နေကြာဆီနှင့် အခြားစားသုံးဆီ ထုတ်လုပ်သည့်စက်များ၊ နည်းပညာဆိုင်ရာများနှင့် ကုန်ကြမ်း သိုလှောင်မှုဆိုင်ရာများအား ရှင်းလင်းဆွေးနွေးသည့် အခမ်းအနား” ကို ၁၇.၆.၂၀၂၄ ရက်နေ့တွင် စက်မှုဝန်ကြီးဌာန ရုံးအမှတ် (၃၇)၊ အစည်းအဝေးခန်းမ၌ Online Zoom Meeting ဖြင့် ကျင်းပ ပြုလုပ်ခဲ့ရာ စက်မှုဝန်ကြီးဌာန၊ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ညွှန်ကြားရေးမှူးချုပ်၊ ဦးသိန်းဆွေက အဖွင့်အမှာစကားပြောကြားပြီး ဆွေးနွေးပွဲကို စတင်ခဲ့ပါသည်။ ဆွေးနွေးပွဲသို့ ရုရှားနိုင်ငံ NPP A-Engineering LLC Company မှ တာဝန်ရှိသူများ၊ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ နေပြည်တော်တို့မှ MSME Agency အဖွဲ့ဝင်များ၊ စားသုံးဆီထုတ်လုပ်မှုဆိုင်ရာ ရင်းနှီးမြှုပ်နှံမှုပြုလုပ်ရန် စိတ်ပါဝင်စားသည့် ပြည်နယ်/ တိုင်းဒေသကြီး (၅) ခု တို့မှ MSME လုပ်ငန်း ရှင်များ၊ ပြည်နယ်/ တိုင်းဒေသကြီး ပြည်ထောင်စုနယ်မြေနေပြည်တော် စက်မှုကြီးကြပ်ရေးနှင့် စစ်ဆေးရေးဦးစီးဌာနများရှိ MSME တာဝန်ခံများ၊ စုစုပေါင်း (၉၈) ဦး တက်ရောက်ခဲ့ကြပါသည်။ ဆွေးနွေးပွဲတွင် ကုန်ချော (၈) တန်ကျ နေကြာဆီစက်နှင့် ကုန်ကြမ်း (၅၀၀) တန် ကြိတ်ခွဲနိုင်မည့် နေကြာဆီစက်တို့ တည်ဆောက်ရန် လိုအပ်သည့် မြေနေရာအကျယ်အဝန်း၊ စက်ပစ္စည်းကုန်ကျစရိတ်အပါအဝင် Layout Plan များ သိရှိနိုင်ရန် ဆွေးနွေးခြင်း၊ ကုန်ကြမ်း တန် (၃၅,၀၀၀) ကြိတ်ခွဲနိုင်သည့်စက်နှင့် Refinery နည်းပညာ အပါအဝင် ကုန်ကျစရိတ် Quotation များ၊ Total Production Line တစ်ခုလုံး၏ Quotation များ၊ Quality Specification တွင် Codex Standard ဖြင့် တိုင်းတာမှု အကြောင်းအရာများအား သိရှိနိုင်ရန် ဆွေးနွေးခြင်း၊ ဆီကြိတ်ဖတ် များတွင် ဆီကျန်ရှိမှုရာခိုင်နှုန်း စသည့်အချက်များအား ဆွေးနွေးခဲ့ကြပြီး လုပ်ငန်းရှင်များ လိုအပ်လျက်ရှိသည့် အချက်များအား ရရှိစေရန်အတွက် ရုရှားနိုင်ငံ NPP A-Engineering LLC Company နှင့် ဤဦးစီးဌာနမှ ချိတ်ဆက်ဆောင်ရွက်ပေးသွားမည်များကို ဆွေးနွေးခဲ့ကြပြီး စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ညွှန်ကြားရေးမှူးချုပ်၊ ဦးသိန်းဆွေက နိဂုံးချုပ် စကားပြောကြားခဲ့ပြီး နေ့လယ် (၁၂:၄၅) နာရီတွင် ဆွေးနွေးပွဲကို ရုတ်သိမ်းခဲ့ပါသည်။